Fâ’ilâtün Fâ’ilâtün Fâ’ilâtün Fâ’ilün
Mürşid odur kim dem-â-dem Hakkı eyleye ıyân
Vech-i pâkinde tecellî eyleye ol bi-nişân
Nutk-ı mıknâtıs ola kâbil vücûdun cezbine
Gaşy ola ger tâlibe kılsa nazar bir kez hemân
Hem ledünnî ilmini bilmekde hızr-ı vakt ola
Hak anunla zâhir olup Hakka ola her zebân
Aşk ile ihyâ ede mürde kulûbı dem-be-dem
Feyz-i irfânı ile mi’râc ide İsâ-yı cân
Zâhir ü bâtında her müşkilleri hall eyleye
Kâşif-i esrâr-ı vahdet ola her dem her zaman
Âlem-i gayb u şehâdet hep ana mekşûf ola
Cism ola âlem ana ol âleme rûh-ı revân
Enfüs ü âfâk dinilen ana nisbet bir ola
Âlem-i vahdetde olmaz zîrâ Hakka în u ân
Hâb-ı bî-dârında her ne kim görürse Hak diye
Vahdet-i Hakdan özin ayırmaya bir dem bir ân
Aşka tergîb eyleyüb âdetleri hark etdire
Kalmaya asla bir uzah hep ıyân ola nihân
Kavl ü fı’l ü hulkını tehzîb idüp sâfî kıla
Aks ura âyîne-i kalbine sırr-ı dü-cihân
Bâde-i vahdet suna hem sohbetine her nefes
Mest ü meczûb etleyüp tayy itdire kevn ü mekân
Nüsha-i vahdet olan nefsini ta’lîm eyleye
Gün-be-gün vire terakkî Hakka ola tercemân
Tâlibe mâhiyet-i zât u sıfatın bildire
Men arefe nefsehu dersinde komaya gümân
Dûre düşmekden kamu uşşâkını tahlîs ide
Gün-be-gün mürdelere vire hayât-ı câvidân
Mâ-hasal yüzin görüp sözin işiden Gaybiyâ
Len terânî gussasın çekmeye ola şâd-mân
Kemikli, Bilal (2000). Sun’ullah-ı Gaybî Dîvânı (İnceleme-Metin). İstanbul: Millî Eğitim Bakanlığı Yay. 355-356.