Fâ’ilâtün Fâ’ilâtün Fâ’ilâtün Fâ’ilün
Ey tecellî-i cemâlin talibi
Gel cemâl-i pire candan tâlib ol
Vey tesellî-i visalin râgıbı
Gel cemâl-i pîre candan tâlib ol
Sâlik-i râha gerekdir aşk-ı Hak
Merd-i Hakka hidmet eyle al sebak
Dide-i Hak-bîn ile gel Hakka bak
Gel cemâl-i pîre candan tâlib ol
Nûr-ı Hakdır görünen nûr-ı cemâl
Anın içün yokdur ana hiç misâl
Budur ancak mazhar-ı küll-i kemâl
Gel cemâl-i pîre candan tâlib ol
Hasta-i aşk olana gelür tabîb
Feyz umar anın içün cümle garib
Oldurur senden olan sana karib
Gel cemâl-i pîre candan tâlib ol
Aşkına düşgil o zâtın rûz u şeb
Keşf ola sırr-ı vücûdun cümle heb
Ayn-ı Rabdır sanma anı gayr-ı Rab
Gel cemâl-i pîre candan tâlib ol
Aşk-ı pir oldu bu yolda reh-nümâ
Anın aşkı olmasa oldun cüdâ
Aşk-ı pirden gayrısıdır mâsivâ
Gel cemâl-i pîre candan tâlib ol
Gaybiyâ kim kılsa hakkânî nazar
Cezbe-i Hak cânına eyler eser
İlmi koyup aynına eyle sefer
Gel cemâl-i pîre candan tâlib ol
Güneş, Mustafa, K. Güler (2003). Kütahyalı Gaybî Sun’ullah ve Şiirleri. Kütahya: yyy. 204-205.